Жыл сайын жүздеген, тіпті мыңдаған итбалық қырылып жатқаны алаңдатады. Итбалықтар - Каспийде ғана мекендейтін, сирек кездесетін жануар. Қызыл кітапқа енген. Егер бұлай жалғаса берсе, итбалық атаулының мүлде жойылып кету қаупі бар. Бір қарасаңыз, аң-құстардың қырылуы табиғи, қалыпты үрдіс болып көрінуі мүмкін. Алайда оның астарына үңілсек, үлкен проблеманың жатқанын көреміз. Себебі биоалуандық экожүйелердің саулығы сіз бен біз үшін, болашақ ұрпақ үшін аса маңызды! Неге дейсіз ғой?! Біз ішетін тағам, дәрі-дәрмек, барлық қажетті материалдар тірі ағзалардан алынады. Бір биологиялық түрдің жойылуы бірнеше тіршілік иесінің жер бетінен жоғалуына әсер етеді. Яғни, табиғаттағы тепе-теңдік бұзылады. Барлық тірі ағзалар бір-бірімен өзара тығыз байланысқан. Өсімдіктер өспесе, топырақтың тоз-тозы шықса, су ресурстары азайса адамзат қалай күн көреді? Міне сол үшін мәселе аса күрделі! Ал өкінішке қарай, жаһанда сирек кездесетін аң-құстар, жан-жануарлар үлкен қарқынмен азайып барады. Алдағы 70 жылда жер бетінде биоалуандылық шамамен 50 пайызға дейін қысқарады деген сарапшылардың болжамы бар. Ойланатын, шұғыл қарекет ететін шаруа. Мемлекет басшысы табиғатқа, экожүйеге қатысты үнемі алаңдаушылық білдіріп, бақылауды күшейтуге пәрмен беретіні осыдан. Жақында Ұлттық құрылтайда экожүйеге түсетін салмақтың артқанын айтып, Үкіметке білікті мамандарды жұмылдыра отырып, мәселені жан-жақты зерделеуді және байыпты шешім қабылдауды тапсырды.
#хабар24 #24KZ #түйінбағдарламасы #экология #итбалықтар #мамандар #экоұйымдар #каспий #арал #теңіз #жануарлар #өсімдіктер #мәселе #індер #қызылкітап #құстар #президенттапсырмасы #экожүйе